KORONADAL CITY- Personal grudge ang ginalantaw nga motibo sang kapulisan sa pagpangluthang patay sa isa ka barangay kapitan sa Poblacion Tacurong City.
Ginkilala ang nasambit nga biktima nga si Sambutuan Butch Magango, barangay kapitan sang
Brgy. Sadsalan, Lambayong, Sultan Kudarat.
Sa interbyu sang Bombo Radyo Koronadal kay PO2 Jun Leo Villalobos sang Sultan Kudarat PNP, naga istorya lamang ang biktima kag ang bata sini nga si Kenneth Ralf Datu sa isa ka talyer makaligad nga nagapakay-o ang mga ini sang ila salakyan sang ginpalapitan ini sang isa ka suspek nga nakamaskara kag ginluthang patay ang barangay kapitan.
Makaligad ang krimen, gilayon nga nagpalagyo ang suspek sakay sang isa ka motorsiklo sa wala mahibaluan nga direksyon.
Nakaangkon ang biktima sang igo sa dughan nga naglapos sa iya nga likod kag gilayon nga gindangat sa balay bululngan apang gindeklarar nga dead on arrival.
Narekober sa crime scene ang duha ka basyo sang kalibre 45 nga armas.
Nahibaluan nga ulihi nga termino subong ni Magango bilang barangay kapitan kag natalana nga ipasa ini sa iya nga bata.
Madumduman nga nagapangatubang sang kaso nga illegal possesion of firearms ang nasambit nga barangay official makaligad nga mangin subject ini sang raid sang kapulisan kag militar.
