KORONADAL CITY – Nakaangkon sang mechanical engine trouble kag indi malain nga paniyempo ang nakaapekto sa pagtibusok sang private chopper kahapon sa Sitio Glandang Brgy. Kablon Tupi, South Cotabato nga nagresulta sa pagkapilas sang 4 katawo lakip na ang piloto.
Ginpahayag sa Bombo Radyo Koronadal ni Tupi Mayor Reynaldo Tamayo Jr nga ini man ang naguwa sa imbestigasyon sang CAAP.
Suno kay Tamayo bag-o lamang nagtake off ang chopper padulong sa Surallah, South Cotabato sang hinali nga napatay ang makina nga gintunaan sang pagtibusok.
Apang, maayo suno pa ang piloto nga si Dennis Figueroa nga utod ni Tantangan Mayor Benjamin Figueroa rason nga nakahugpa gihapon nga luwas apisar nga nagtibusok ini sa duta.
Nahibaluan nga may live wire kag mga salsalon malapit sa crash site nga kun nag-igo ang chopper, posible nga naglupok ini.
Sa subong padayon nga nagapaayo ang mga pasahero sa hospital nga ginalakipan sang ni Dr. George Gonzales kag mga dumuluong gikan sa Europa nga sanday Cecilia Donaire kag Alicia Bingco, nga lunsay mga executives sang isa ka pribado nga kumbuyuhan.
Nag-abot naman sa P30 milyon ang kantidad sang damyos sa chopper nga nawasak bangud sa insidente.
