KORONADAL CITY- Napunggan sang tropa sang 1st Mechanized Infantry Battalion ang panibag-o na naman kuntani nga pagpamomba sa National Highway sa Brgy. Saniag Ampatuan, Maguindanao.
Nahibaluan nga nakabaton sila sang report nga isa ka Improvised Explosive Device (IED) sa nasambit nga lugar ang natukiban kun sa diin gilayon nga nagresponder ang tropa kag ginkordon ang area kag ginpunggan ang mga sibilya nga mag-agi.
Sa ginpatigayon nga safety procedure sang Explosive Ordnance Disposal (EOD) team sang militar narekober ang IED nga ginhimo sa 105mm projectile, wires kag 9 volts nga battery.
Suno naman kay 6ID Commander Brigadier General Cirilito Sobejana tinutuyo sa pagbilin sang IED sa lugar amuh ang pagpalapnag sang bayolente nga kalakasan sa mga sibilyan.
Ginkondinar naman ang nasambit nga panghitabo samtang ginpasalamatan naman ang mga sibilyan nga nagpakig-angot sa tropa sang gobyerno.
Sa karun ginahibalo pa kun ano nga grupo ang yara sa likod sang nasambit nga insidente.
