KORONADAL CITY – Naglab-ot sa lima ka mga drug suspects ang madinalag-on nga naarestar sang mga otoridad sa ginpatigayon nga asod-asod nga anti-drug operation diri sa siyudad sang Koronadal.
Ini ang ginkumpirmar ni Dr. Glorio Sandig, City CADAC Action officer sa interbyu sang Bombo Radyo Koronadal.
Ginkilala sini ang mga nadakpan nga sanday Kim Gabuya nga residente sang Brgy. Topland, Koronadal City apang nadakpan sa apartment sini sa Brgy. Sto. Nino; Alyas Kulot sang Brgy. GPS nga nadakpan sa Paradise Inn; Jesson Percio Taton alyas Nonoy nga residente sang Megalland Subd. Brgy Carpenter Hill; JohnLee Fernandez Astrologo alyas Lopot kag Jerson Villaruel nga lunsay mga residente sang Brgy. GPS.
Nahibaluan nga nadakpan mismo sa akto nga naga-pot session kanday Astrologo kag Villaruel.
Suno kay Sandig, kadam-an sa mga ini ang drug surrenderees samtang ang iban notoryos drug pusher nga madugay na ginasurveillance sang mga otoridad.
Nakuha sa posisyon sang mga suspek ang mga ginapatihan nga droga kag nagkalain-lain nga drug paraphernalia.
Sa subong, yara na sa kustodiya sang Koronadal City PNP ang mga ini kag natalana nga pasakaan sang nagakaigo nga kaso.
