KORONADAL CITY – Ginabulubanta nga nagalab-ot sa P30 milyunes pesos ang inisyal nga damyos sa pagkasunog sang duha ka panalgan nga edifisyo sang SunStar Commercial sa siyudad sang Tacurong.
Ini ang ginpahayag ni Supt. Julio Gabut, hepe sang BFP-Tacurong sa interbyu sang Bombo Radyo Koronadal.
Suno kay Gabut, nag-umpisa ang kalayo sa ikaduha nga panalgan sang edifisyo mga alas-7:34 kag na-fire out alas-11:10 na kaina sang aga.
Apang, ginahibalo pa sang mga ini kun ano gid ang ginahalinan sang kalayo.
Nahibaluan nga ginapanag-iyahan sang negosyante nga si Jhonald Tan ang nasambit nga edisfisyo kun diin sa second floor man nagapuyo ang mga ini.
Nagdugay man sang halos 4 ka oras ang sunog antes nga gindeklarar nga fire out sang BFP-Tacurong.
Nahibaluan nga 7 ka mga fire trucks ang nagbulig agud nga matapna ang kalayo kag indi na maglapta pa sa iban nga mga edifisyo.
Trienta naman ka mga empleyado sang nasambit nga edifisyo ang nadulaan sang trabaho bangud sa sunog.
