KORONADAL CITY- Ginahibalo pa sa subong sang mga otoridad kun matuod nga mga myembro sang isa ka dako nga drug group ang siyam (9) nga napatay sa pagserbe sang search warrant sang gintingob nga pwersa sang mga otoridad kag suldado sa Sitio Biao,Barangay Kilada Matalam North Cotabato pasado alas-11 kagab-i tubtob kaina sang kaagahon.
Ini bangud suno kay PSupt Bernard Tayong, duha lamang kuntani ang target sang operasyon apang nagbato ang mga ini kaupod na ang ila nga mga ka-grupo nga armado sang matag-as nga kalibre sang armas luthang rason nga nagresulta sa kamatayon sang 9 ka mga drug suspects.
Bitbit sang gintingob nga pwersa sang Cotabato Police Provincial Office, 7IB sang Philippine Army kag Matalam PNP kag sang iban pa nga tropa sang gobyerno ang search warrant nga ginpaguwa ni Hon. Judge Alandrex Betoya sang RTC Branch 16 batuk kanday Kadting Kasan kag Intan Aban may kaangtanan sa RA 9165.
Ginkilala ang mga napatay nga sanday Terereng Salping , Burad salping, Dadting Kasan , isa ka alyas Orong nga residente sang Mlang, Intan “Puti” Aban kag Mauntapo Aban samtang padayon pa nga ginahibalo ang identity sang tatlo ka iban pa nga yara na sa punerarya sa subong.
Ginpahayag ni Tayong nga samtang pasulod na ang raiding team sa target area nakita sang mga suspek ang operating team rason nga nagpalupok ang mga ini nga nagresulta sa engkwentro nga nagdugay sang pila ka minuto.
Narekober naman sa crime scene ang mga High powered Firearms, RPG, mga bala kag droga.
