KORONADAL CITY – Yara sa trauma healing process pa daw tubtob sa subong si Fr. Teresito “Tisoy” Suganob, ang pari nga isa sa mga survivors sang Marawi siege isa ka tuig na ang nakaligad.
Ini ang ginpahayag ni Fr. Suganob sa eksklusibo nga interbyu sang Bombo Radyo Koronadal.
Suno kay Fr. Tisoy, mabudlay gihapon para sa iya nga malipatan ang nangin eksperiensiya sa kamot sang Maute-ISIS gikan sa una nga adlaw nga ginhostage siya tubrob sa adlaw nga nakaluwas ini kaupod ang iban pa nga mga survivors.
Ginpahayag sang pari nga tubtob sa subong indi madula sa iya ang kahadlok sa mga terorista, mga lupok sang armas luthang kag mga airstrikes subong man ang pagsinggitan sang mga residente nga apektado sang giyera.
Aminado si Fr. Tisoy wala pa siya fully nga nakarecover bangud kun mabudlay ma-rebuild kag ma-reconstruct ang mga naguba nga edifisyo sa battle area subong man kabudlay ma-rebuild ang pagkatawo sang mga survivor kasubong sa iya.
At least 5 years pa ang advice sang psychologist nga maka-fully recover siya kag mabalik sa normal ang pangabuhi sini labi na ang pagbalik sa serbisyo bilang pari.
Si Fr. Tisoy ang nagpanguna sa ginpatigayon nga misa sa banwa sang Norala South Cotabato bilang pagkomemorar sa una nga tuig nga anibersaryo sang Marawi siege.
