KORONADAL CITY – Nagresulta sa kamatayon sang isa ka Purok President kag pagkaarestar naman sang isa pa ang ginpatigayon nga operasyon sang mga otoridad sa duha ka barangay sa banwa sang Tupi, South Cotabato kaina sang aga.
Ginkilala ang napatay nga si Mindatu Aminola, yara sa legal nga edad kag Purok president sang Purok A-8, Brgy. Polunoling sa nasambit nga banwa.
Suno sa mga otoridad nagbato si Aminola rason nga naluthangan ini sang operating team.
Nakuha sa posisyon sini ang isa ka armas luthang kag mga bala.
Arestado naman ang isa ka Bayan Dimalao matapos nga makuhaan sang 4 ka sachet sang ginapatihan nga shabu kag armas luthang.
Samtang, nakapalagyo naman ang isa ka re-elected brgy. kagawad sang Palian nga si Abe Basil nga nakuhaan man sang 4 ka sachet sang shabu kag granada sa puluy-an sini.
Nahibaluan nga kinse (15) ka search warrant ang bibit sang gintingob nga pwersa sang South Cotabato PNP, Regional Anti-Drug Enforcement Unit, Regional Mobile Force Batallion kag Tupi PNP sa mga high value target sa Barangay Palian kag Brgy. Polunoling sa nasambit nga banwa kun diin nag-negatibo naman ang iban sa mga ini.
Madumduman nga kahapon duha man ang napatay lakip na ang isa ka ex-police sanmtang 1 man ang naaresto sa ginpatigayon nga operasyon sang mga otoridad sa banwa sang Sto Niño, South Cotabato.
