KORONADAL CITY – Nagpatigayon sang protesta sa talatapan sang Commission on Elections sa banwa sang Tboli, South Cotabato ang yara sa masobra isa ka gatus nga mga supporters sang napierde nga mga kandidato sa pagka-barangay Kapitan sang Brgy. Aflek sa nasambit nga banwa.
Sa eksklusibo nga interbyu sang Bombo Radyo Koronadal kay Haidelyn Malanca, dismayado sila sa Comelec bangud sang adlaw mismo sang eleksiyon ginreklamo na nila ang dinayaay nga natabo apang gindayon sa gihapon daw ang inisipay kag ginproklamar si Brgy. Capt. elect Balansi Kayawan.
Suno kay Malanca, magasunod sila sa proseso kun wala lamang nila nasaksihan ang pagpangdaya nga ginhimo sang mga manunudlo nga nagatindog board of election inspectors (BEI’s).
Apang, nagpanidugan si Municipal Comelec Officer Nemia Española nga nagasunod lamang siya sa proseso kag ginarespeto niya man ang ginsang-at nga petisyon sang mga ini batuk sa nagdaug nga kandidato.
Suno kay Española, ginbaton sini ang ila nga petisyon kag nakahanda siya nga i-endorse ini sa provincial comelec office sang South Cotabato kag sa comelec national office kag hulaton man ang ipaguwa nga desisyon.
Una naman nga ginpanginwala sang nadaug nga Brgy. Kapitan nga wala sang dinayaay nga natabo sa ila nga barangay sa baylo ginpasibangdan sini ang mga supporters sang kasumpong nga kandidato nga indi ang mga ini rehistrado nga botante sang ila nga barangay.
