KORONADAL CITY – Temprano pa nga nagtipon sa nagkalain-lain nga lugar sa Mindanao ang mga Muslim sa opisyal nga pagsugod sang balaan nga bulan sang Ramadan subong nga adlaw.
Ini makaligad nga gin-anunsyar ni Grand Mufti Abu Huraira Udasan sang Darul Ifta para sa Maguindanao kag Cotabato nga nakit-an na ang new moon sa Malaysia nga nagatumod sa pagsugod sang ramadan.
Kadungan sini, gin-awhag naman sang mga religious leaders ang tanan nga mas mangin disiplinado sa pag-puasa kag mahadlok kay Allah agud nga mangin mapag-on sa pag-atubang sa hangkat sang kabuhi.
Ang Ramadan ang ika-siyam sa 12 ka bulan sang Islamic calendar nga ginadumdom sang mga Muslim bilang bulan sang pagpuasa kag pagdumdom sa una nga rebelasyon sang Quran ni prophet Muhammad.
Ginalayman man nga magahimo sang kaayuhan ang mga ini sa isa ka bulan sang Ramadan kalakip na ang paglikaw sa paghimo sang sala, paglikaw sa pag-inom kag marital sex.
Kadungan sini, ginpahugtan naman sang mga otoridad ang seguridad sa Maguindanao kag kaiping nga probinsiya sa posibilidad nga pag-atake sang BIFF.
Ginalauman naman nga magtakop ang Ramadan sa palaabuton nga Hulyo 5.
