KORONADAL CITY- Yara na sa luwas nga kahimtangan ang 1 ka sakay sang private helicopter nga nagtibusok sa probinsya sang South Cotabato.
Sa pagresponder sang T’boli PNP kaupod ang 27th Infantry Battalion gilayon nga naluwas kag nadala sa balay bululngan ang sakay sang private helicopter nga mister ni Davao City Councilor Maria Belen Acosta nga si Reynaldo Acosta.
Sa interbyu sang Bombo Radyo Koronadal kay PCI Ramil Villagracia hepe sang T’boli PNP nagtibusok ang pribado nga helicopter sa boundary sang Sitio Bianan Brgy. Basag T’boli South Cotabato kag Brgy. Magsaysay sang Polomolok South Cotabato.
Nakabulig man sa pagrescue sa biktima ang mga residente sa namensyunar nga lugar kaupod ang mga katapo sang Provincial Disaster Risk Reduction and Management Office kag Philippine Red Cross South Cotabato Chapter.
Suno naman kay PDRRMO Chief Mila Lorca, ang ginsakyan na helicopter ni Acosta ang ginrentahan sang isa ka pribado nga kumbuyuhan kag padulong kun tanin sa Kling, Kiamba Sarangani Province.
