KORONADAL CITY- Ginbuyagyag sang mga supporters kag pila ka botante gikan sa banwa sang T’boli ang ginaaligar nga dinayaay sang naglabay nga brgy. kag sk elections partikular na sa Brgy. Aflek, T’boli South Cotabato.
Sa interbyu sang Bombo Radyo Koronadal kay Nerissa Daniel sa isa sa mga reklamante kag watcher sang isa sa mga nagapapili nga Brgy. Chairman, kalakip sa mga dinayaay nga ila nasaksihan sang eleksiyon amo ang mga alleged ready made nga mga balota nga ginpanghatag sa sulod sang presinto, pagbutang sang manunudlo sang mga balota sa ila nga bag kag ang pagboto sang suno pa mga indibidwal nga madugay na nga patay.
Nahibaluan nga ang mga ginaakusaran nila nga nagpangdaya amo ang kampo sang nagdaug nga kapitan nga si Balansi Kayawan kag pila ka mga manunudlo kag supporters nga sanday Samuel Tariga, Juvy Col, Eugene Col kag Myrna Santibaynes.
Samtang, ang mga kapitan nga suno pa nagpangdaya amo sanday Donald Daniel, Anton Listam kag Buan Lintang.
Sa subong nagpanawagan sila sa Comelec nga imbestigaran ang nasambit nga hitabo labi na nga may mga laragway kag videos sila sang ginpahayag nga dinayaay sa eleksyon.
