KORONADAL CITY- Wala na nakaapekto kay incumbent Brgy. Kapitan Bobby Delalamon ang pagka-implikar sang iya pangalan sa ginpaguwa nga narcolist sang PDEA sang damlag lamang.
Ini ang ginpamatud-an ni Kapitan Delalamon matapos nga liwat ini nga nagdaug bilang Kapitan sang Punong Grande, Banga, South Cotabato.
Sa eksklusibo nga interbyu sang Bombo Radyo Koronadal ginpahayag ni Delalamon nga nagapasalamat siya sa liwat nga pagpili sa iya sang katawhan agud magpanerbisyo bilang Kapitan.
Suno sa iya, wala siya nagpahimo sang tarpaulin sang nagligad nga campaign period bangud nagapati siya nga kilala na siya sang mga tawo.
Wala man suno pa siya nagpatigayon sang kapehan kag rally kundi nagpamalay-balay agud magpangampanya.
Dugang pa sang opisyal nga napamatud-an niya nga nakita sang katawhan ang maayo niya nga pagpanerbisyo rason nga ginbalik siya sa posisyon.
Ginpasiguro man sang Kapitan nga nakahanda siya nga atubangon ang ipasaka nga kaso sang PDEA batuk sa iya.
