KORONADAL CITY- Ginsuguran na ang pagpatigayon sang Door to Door Supplemental Immunization sa bug-os nga probinsiya sang South Cotabato bangud sa measles outbreak sa Mindanao.
Ini ang ginpahayag ni Disease Surveillance Officer Cecil Lorenzo.
Suno kay Lorenzo, naglab-ot na sa duha ka bata ang napatay bangud sa tipdas sa probinsiya nga wala makabaton sang bakuna.
Magatakop naman sa Hunyo 8, 2018 ang isa ka bulan nga Ligtas Tigdas Door to Door Supplemental Immunization Activity (SIA) sang Integrated Provincial Health Office (IPHO) South Cotabato.
Sa nasambit nga programa, magapaduloang ang mga barangay health workers sa mga puluy-an ukon sa mga designated areas sa mga purok kag barangay agud nga maghatag sang bakuna kontra tipdas sa mga kabataan nga yara sa edad nga 6 tubtob 9 months.
Kaangot sini, ginaawhag ni Lorenzo ang mga ginikanan nga indi na magpangduha-duha nga pabakunahan ang ila nga mga bata agud nga makaangkon sang proteksyon kag indi malatnan sang tipdas kun mapabay-an posible pa nga ikapatay sang biktima.
