KORONADAL CITY – Ginpasiguro sang kapulisan sa Rehiyon dose nga padayon ang ila nga monitoring sa halos 400 ka mga barangay sa bug-os nga Socsksargen nga ginpaidalom sa election hotspots subong nga election period.
Ginpahayag ni PRO-12 Director PCSupt. Marcelo Morales sa Bombo Radyo Koronadal nga sa nasambit nga numero 5 ang ginakabig nga yara sa critical areas bangud sa mainit nga political rivalry kag presensiya sang mga armado nga grupo.
Aminado si Morales nga sang nagligad nga eleksiyon may mga napagkit nga problema sa nasambit nga mga lugar kun diin napagkit man ang pag-isol sang pila ka mga manunudlo nga nagatindog nga BEI bangud sa delikado nga lugar.
Kadungan sini, ginpasiguro man sang Regional Director nga handa na ang yara sa 150 police officers nga gin-training mangin special BEI’s sa Mayo 14, ukon sa mismo adlaw sang eleksiyon.
