KORONADAL CITY – Nagbakwit ang yara sa halos 700 ka mga sibilyan gikan sa nabukid nga bahin sang Barangay Kematu, Tboli, South Cotabato matapos nga mag-engkwentro ang mga suldado sang 27th IB, Philippine Army kag ginapatihan nga 50 ka armado sang Front 73 Far South Mindanao Region sang New Peoples Army.
Ang nasambit nga mga residente ang gikan sa mga Sitio sang El Lubog, Lemsinenag kag Blangas nga suno pa nangin kampo naman sang mga rebelde sa nasambit nga barangay.
Ginpahayag sa Bombo Radyo Koronadal ni Lt. John Alvin Maunahan, spokesperson sang 27th IB, Philippine Army nga natabo ang engkwentro samtang nagapatigayon sang monitoring ang mga suldado angot sa campaign period matapos mareport nga may mga armado sa nasambit nga lugar.
Suno kay Maunahan, pabalik na kuntani sa kampo ang mga suldado sang makaengkwentro ang mga rebelde nga bitbit sang mga highpowered firearms kun diin nagdugay sang halos 40 minutos ang engkwentro.
Wala naman sang may nareport nga pilason ukon casualties sa duha ka bahin.
Nag-withdraw suno pa ang mga NPA padulong sa Barangay Danlag, Tampakan, South Cotabato.
Samtang, gilayon naman nga naghatag sang bulig ang LGU-Tboli kag PDRRMO-South Cotabato sa mga evacuees.
Nahibaluan nga ang nasambit nga lugar ang isa sa mga barangay nga yara sa electioan hotspots subong nga election period.
