KORONADAL CITY -May plano na nga magsungka sa mga otoridad si Naga Mangudadatu, bata ni Sultan Kudarat Datu Pax Mangudadatu.
Ini ang kumpirmasyon nga ginpalab-ot ni PSSUPT James Gulmatico, provincial director sang Sultan Kudarat sa interbyu sang Bombo Radyo Koronadal.
Suno kay Gulmatico, nakig-angot na sa iya si Naga kag ginahulat na lamang ang tion sang pagsungka sini.
Madumduman nga ginpasakaan si Naga sang kaso nga two-counts of murder bangud sa pagpatay sa mag-asawa nga Jose kag Marissa Ballion nga lending collector sa Barangay Tamnag, Lutayan, Sultan Kudarat.
Magluwas kay Naga kaupod man sa mga ginpasakaan sang kaso ang 4 ka iban pa.
Si Naga ang ginatudlo nga nagapanguna nga suspek sa pagluthang-patay sa mga biktima.
Una diri, magluwas sa kaso nga murder, ginahibalo pa sang mga otoridad kun mahimo man nga kasuhan sang infanticide ang suspek makaligad nga mahibaluan nga nagadala sang apat ka bulan si Marissa.
