KORONADAL CITY – Kapareho suno pa ang bomb components sang narekober nga improvised explosive device (IED) sa puluy-an sang isa ka katapu sang Moro Islamic Liberation Front (MILF) sa ginpatigayon nga raid sang mga otoridad.
Ini ang ginkumpirmar ni Police SeniorSupt Nestor Salcedo, Provincial Director sang South Cotabato sa interbyu sang Bombo Radyo Koronadal.
Suno kay Salcedo, dako ang posibilidad nga isa lamang ang bomb maker nga nagpalupok sa Cathedral sa siyudad sang Koronadal sang Abril 29 kag ang isa pa ka IED nga nadetonate sa 747 convenience store kag sang narekober nga IED sa Sultan Kudarat.
Kaangot sini, ginmandu na sang opisyal ang madalom pa nga imbestigasyon.
Madumduman nga nangin target sang operasyon nga ginpatigayon sa 4th Special Action Battalion, SAF, Sultan Kudarat PNP, 1st Mechanized Infantry Battalion kag 33rd IB, Philippine Army sa puluy-an ni Lasian Manibpel sa Brgy. Sisiman, Lutayan Sultan Kudarat.
Nakapalagyo naman ang suspek apang narekober ang ID sini nga nagapamatuod nga myembro siya sang MILF kag ang mga matag-as nga armas luthang kasubong sang rifle grenade, Cal 5.56mm M16 Rifle, 2 Shotgun kag steel magazine sang M16 Rifle.
Nahibaluan nga ang nasambit nga barangay ang isa man sa ginakabig nga hotspot area sa Sultan Kudarat.
