KORONADAL CITY – Pagpanghadlok lamang ang tinutuyo sang mga suspek nga nagbutang sang ginaaligar nga 2 ka bomba sa national highway nga sakop sang boundary sang Datu Salibo kag Datu Piang sa probinsiya sang Maguindanao nga nagtuga sang pagsira sang nasambit nga dalanon kagab-i tubtob kaina sang aga.
Ini ang ginkumpirmar ni Capt. Arvin Encinas, spokesman sang 6th ID Philippine Army sa interbyu sang Bombo Radyo Koronadal.
Suno kay Encinas sa pag-imbestigar sang EOD team natukiban nga indi IED kundi duha ka garapon nga may unod nga baras nga ginputos sa masking tape ang ginbilin sa lugar.
Sa subong nagapadayon ang imbestigasyon sang mga otoridad agud matumod ang mga suspek apang ginakonsiderar sunoa pa ang grupo sang Bangsamoro Islamic Freedom Fighters (BIFF).
Samtang, padayon man ang monitoring kag pagbantay sang mga suldado sa mga lugar sa Maguindanao nga ginakabig yara sa hotspot areas labi na nga nagahilapit ang Baranggay kag Sangguniang Kabataan eleksiyon.
