KORONADAL CITY- May anggulo na nga ginasundan ang mga otoridad sa ginhimo nga pagpangluthang sang riding in tandem sa duha ka suldado sang 33rd IB, Philippine Army sa Sultan Kudarat nga nagresulta sa kamatayon sang isa ka pagkapilas man sang isa pa.
Ginkilala ang napatay nga si Cpl. Ruel Basco Durdas, 34 nga residente sang Isulan, Sultan Kudarat samtang pilason naman si Sgt. Julhaib B Ajijul nga lunsay aktibo nga suldado sang 33rd IB, Makabayan Batallion.
Ginpahayag sa Bombo Radyo Koronadal ni Lt. Col. Harold Cabunoc, commanding officer sang 33rd IB, Philippine Army nga ginmanduan sini ang duha nga magpatigayon sang surveillance sa lugar nga ginapatihan ginapanaguan sang mga terorista.
Gikan suno pa sa bahin sang Barangay Tinumigues kag padulong sa sentro nga bahin sang banwa sang Lambayong ang mga biktima sakay sang motorsiklo sang ginsundan sang riding in tandem kag pagpalapit sa ila gilayon nga ginpalukpan ang mga ini.
Gilayon naman nga nagpalagyo ang mga suspek matapos palukpan ang mga suldado.
Gindala pa sa balaybululngan ang mga biktima apang dead on arrival na ang isa sa mga ini samtang nagapaayo naman ang pilason nga suldado.
Hugot naman nga ginkundenar sang opisyal ang natabo sang mga suldado sang Makabayan Batallion.
