KORONADAL CITY – Kaso nga paglapas sa customs and tariff code of the Philippines ang ginapangatubang sa subong sang 3 ka mga Indonesian nga nadakpan nga nagapalusot sang mga smuggled nga sigarilyo gikan sa ila nga pungsod.
Ini ang ginkumpirmar ni PRO-12 Director P/C/Supt Marcelo Morales sa interbyu sang Bombo Radyo Koronadal.
Suno kay Morales, pagasiguruhon sang kapulisan nga magapanabat ang mga suspek bangud sa ila ginhimo apisar nga mag-apela ang ila nga pungsod para sa ila nga kahilwayan.
Madumduman nga masobra isa ka kahon nga smuggled sigarilyo nga Gudang Baru gikan Indonesia ang nakuha sa mga suspek sa ginpatigayon nga operasyon sa bodega nga ginapanaguan sang mga ini sa Purok Kulasi, Brgy Labangal, General Santos City.
Padayon naman nga ginapangita sa subong ang tag-iya sang bodega nga si Alias Toto Malik.
Sa subong yara na sa custody sang mga otoridad ang mga nakumpiskar nga sigarilyo lakip na ang motorbanca nga gingamit sang mga suspek.
Kaangot sini, ginpahugtan pa sang kapulisan ang monitoring sa mga dumuluong nga nagaguwa-sulod sa Rehiyon 12 labi na sa mga nagapatigayon sang illegal nga aktibidad.
