KORONADAL CITY – Nagapangatubang na subong sang kaso nga two-counts of murder si Naga Mangudadatu, anak ni Sultan Kudarat Datu Pax Mangudadatu bangud sa pagpatay sa mag-asawa nga lending collector sa Barangay Tamnag, Lutayan, Sultan Kudarat.
Ini ang ginkumpirmar ni Senior Insp. Herman Luna, hepe sang Lutayan PNP.
Suno kay Luna, magluwas kay Naga kaupod man sa mga ginpasakaan sang kaso ang 4 ka iban pa.
Madumduman nga si Naga ang ginatudlo nga nagapanguna nga suspek sa pagluthang-patay sa mag-asawa nga Jose kag Marissa Ballion sang Domingo.
Magluwas sa kaso nga murder, ginahibalo pa sang mga otoridad kun mahimo man nga kasuhan sang infanticide ang suspek makaligad nga mahibaluan nga nagadala sang apat ka bulan si Marissa.
Samtang, ginmandu na mismo sang gobernador ang pagpaarestar sa iya bata nga nagapanago sa gihapon tubtob subong.
