KORONADAL CITY- Gilayon nga ginmanduan sang mga otoridad ang isa ka large-scale mining company sa banwa sang Tboli, South Cotabato nga magpatigayon sang information kag education campaign angot sa mga eksplosibo nga ginagamit nila sa mining operation.
Ini makaligad ang natabo nga pagsigabong sang blasting cap sa sulod mismo sang Barangay Kematu Elementary School nga ginkapilas sang duha ka estudyante.
Ginkilala ang mga napilasan nga sanday Ronald Elidon kag Darwin Awan, lunsay Grade 4 pupil sang nasambit nga buluthuan.
Suno kay Chief Insp. Ramil Villagracia, hepe sang Tboli PNP, ang Tribal Mining Corporation (TMC) ang nagapanag-iya sang nasambit nga eksplosibo.
Napulot suno pa sang mga bata ang blasting cap sa guwa sang ila nga buluthuan, gindala sa sulod kag ginhampangan tubtob nga nagsigabong.
Kadungan sini, ginrekomendar na sa mining company ang paghatag sang impormasyon sa mga tawo sa lugar angot sa kun ano ang ginatawag nga blasting cap kag iban pa nga eksplosibo nga ila ginagamit kag kun ano ini ka delikado.
Apang sa subong wala pa sang compliance ang TMC.
