KORONADAL CITY- Nagapadayon ang paglagas sang Sultan Kudarat PNP kag sang 14th Mechanized Company sang Philippine Army sa isa ka suspek nga nagahupor sang iligal nga armas, eksplosibo kag iligal nga droga makaligad makapalagyo sa ginpatigayon nga search warrant implementation sa Prk. Rang-ay Brgy. Poblacion, Lambayong Sultan Kudarat.
Sa impormasyon nga ginpalab-ot ni Bombo Correspondent Arnel Palada, Ginpahayag ni PSI Samuel Domingo sang Lambayong PNP nga ang suspek ang nakilal-an lang sa pangalan nga Toto Flores yara sa legal nga edad kag residente sang nasambit nga lugar.
Nahibaluan nga naalerto ang suspek sa ginpatigayon nga operasyon rason nga madasig ini nga nakapalagyo bag-o pa man nag-abot ang mga otoridad.
Ginhalughog naman ang puluy-an ni Flores kun sa diin narekober ang isa ka box nga may unod nga 6 ka pakete sang shabu, 1 ka papel nga may yara sang unod nga marijuana kag 1 pa ka granada.
Sa karun magapangatubang ang suspek sa kaso nga paglapas sa R A 9165 o Comprehensive Dangerous Drugs Act of 2002 kag paglapas sa R A 9516 o Law on Explosives.
