KORONADAL CITY – Ginkasal na ang radioman kag ang nobya sini nga medic sang 33rd IB Philippine Army matapos nga magtrending bangud sa pinasahe nga proposal samtang yara sila sa operasyon batuk sa mga bandido nga grupo kag NPA sa Sultan Kudarat.
Ginkumpirmar ni Lt. Col. Harold Cabunoc, commanding officer sangn 33rd IB Phil. Army ang pagtambong sini sa kasal nanday Corporal Denemar Albani kag PFC Christine Porcadilla kahapon nga adlaw.
Suno kay Cabunoc, isa siya sa mga nagtindog nga principal sponsor sa kasal sang duha kaupod ang mga opisyal sang Sultan Kudarat..// Dugang pa ni Cabunoc nga ang kasal sang duha ang isa ka pamatuod nga kasubong sang mga ordinaryo nga pumuluyo luyag man sang mga suldado nga mangin malipayon kag makaangkon sang kaugalingon nga pamilya.
Sa subong, yara pa sa honeymoon break sanday Mr. Denemar Albani kag Mrs. Christine Porcadilla-Albani.
Madumduman nga natabo sang Pebrero ang wedding proposal ni Cpl. Albani kay Porcadilla samtang nagapahuway sila sa patrol base sa tunga sang kagulangan sa Bagumbayan.
Pareho nga nag-atubang naman sa serye sang engkwentro kontra sa mga BIFF, NPA kag Drug syndicates sanday Porcadilla kag Albani.
Gilayon naman nga gin-aprubahan ni Cabunoc ang permit to marry sang duha bangud sa pasado man sila sa tanan nga mga requirements sang Philippine Army para sa mga suldado nga luyag magpangasawa.
