KORONADAL CITY- Dismayado ang alkalde sang banwa sang Surallah, South Cotabato sa nagalapta nga sex video sang isa ka babaye kag nobyo sini nga may hashtag nga #SurallahGirl.
Sa interbyu sang Bombo Radyo Koronadal kay Mayor Antonio Bendita, ginpahayag sini nga indi makapaayo sa imahen sang ila nga banwa ang nagalapta nga video labi pa kag pangalan sang ila nga banwa ang ginbutang sa nagtrending nga iskandaloso nga video.
Kaangot sini, magasinapol suno pa subong nga adlaw ang alkade kag chief of police sang banwa sang Surallah agud nga istoryahan ang problema.
Kinahanglan suno pa nga mauntat na ang pagpalapta sang sini sa social media agud nga indi maguba ang ila nga banwa.
Pagahibaluon man sang mga otoridad kun sin-o ang nagpalapta sang video agud mapasabat ang mga ini.
Madumduman nga gin-istoryahan sa South Cotabato kag ginapiyestahan sa social media ang malain nga video nga ginasiling kuha sang magkarelasyon nga nagapakighilawas nga gikan sa nasambit nga banwa.
