KORONADAL CITY- Nagapakita sang pagkadismaya si Bayan Muna Representative Carlos Isagani Zarate sa mga precondition ni President Rodrigo Duterte bag-o tigayon nga magbalik sa negotiating table ang gobyerno kag ang CPP-NPA-NDF.
Sa ekslusibo nga interbyu sang Bombo Radyo Koronadal kay Zarate indi suno pa dapat makaangkon sang kondisyon bilang paghatag sang respeto sa anay mga nakasugtan sang 2 ka bahin kag pagpakita sang commitment sa pagbalik sa peace talks.
Wala man ini naga ugyon sa luyag matabo sang presidente nga papulion ang mga lider kag myembro sang komunista agud himuon sa Pilipinas ang peace negotiation base sa timeline nga ginhatag sini bangud nagalapas suno pa ini sa Joint Agreement on Safety and Immunity Guarantees kag ginakabig nga unfair.
Dapat man suno pa nga himuon ang negosasyon sa mga pungsod nga neutral kasubong sang Norway ukon The Netherlands agud mangin patas sa magtimbang nga bahin kag malayo sa anuman nga surveillance, harassment, search, arrest, detention, prosecution kag interogasyon.
