KORONADAL CITY- Tuman nga pressure bangud sa asud-asod nga military operations, ini ang nagduso sa 4 ka mga myembro sang Bangsamoro Islamic Freedom Fighters agud magsungka sa militar sa probinsya sang Maguindanao.
Sa eklusibo nga interbyu sang Bombo Radyo Koronadal kay Army Captain Arvin Encinas tagpamaba sang 6th Infantry Division Philippine Army, ang 4 ka mga nagsungka ang ginakabug-usan man sang ila kumander kun sa diin nabatyagan na suno pa sang mga ini ang hugot nga paglagas sa ila kag bangud man sa naga dyutay nga kalibutan nga ila ginahulagan rason nga nagdesisyon sila nga magsungka bag-o pa mapatay sa asud-asod nga opensiba sang militar.
Kadungan sini, ginsungka man nila ang ila matag-as nga kalibre sang mga armas kag mga eksplosibo kun sa diin may ginbuyagyag man ang mga ini nga mga importante nga mga impormasyon agud makabulig sa paglagas sa iban pa nga mga anay kaupdanan nga nagapalapnag sang bayolente nga kalakasan sa rehiyon.
Sa karun ginpaidalom na sa imbestigasyon ang mga nagsungka nga BIFF rebels.
