KORONADAL CITY- Nakapagkit sangg asud-asod nga engkwentro sa tunga sang Armed Forces of the Philippines kag Bangsamoro Islamic Freedom Fighters sa probinsya sang Maguindanao.
Nahibaluan nga ang bag-o nga engwkentro ang nag-ibwal humalin pa sang lunes kag nagapadayon tubtob sa karun kun sa diin una nga napagkit ang engkwentro sa Brgy. Kitango, Datu Saudi Ampatuan Maguindanao kag na-engkwentro sang 1st platoon sang 63rd Division Reconnaissance Company (63DRC) sa pagpamuno ni 1Lt John Ronald R Pagarita ang terorista nga BIFF.
Ginsundan man ini sang pakig engkwentro sang 2nd Mechanized Infantry Battalion sa ila nga Detachment sa Barangay Pagatin 1, Datu Salibo Maguindanao, kag na engkwentro ang grupo ni kumander Abu Nasria nga nagdugay sang 5 ka minuto.
Nag-ibwal man ang kinagamo sa Sitio Nanas, Brgy Pamalian, Shariff Saidona Mustapha, Maguindanao, kun sa diin nakig engkwentro man 1st Mechanize Infantry Company sa pagpamuno ni Capt. Librado R Olunan batuk sa mga terorista.
Samtang sa Brgy. Elian, Datu Saudi Ampatuan, Maguindanao nakigbaslanay man sang bala ang militar sa mga terorista nga nagdugay sang 15 minutos kag nagresulta sa pagkapilas sang 2 ka mga suldado samtang napagkit naman ang 11 nga patay sa bahin sang BIFF nga padayon pa nga ginakumpirmar.
Madamo naman nga mga armas ang narekober sa mga kuta sang BIFF makaligad ang mga ini nga magpalagyo kun sa diin sa karun suno kay Army Capt. Arvin Encinas, tagpamaba sang 6th ID Philippine Army ginmando na ni Brigadier General Diosdado Carreon, Commanding General sang 601st Infantry Brigade ang paglagas sa mga nabilin pa nga terorista.
