KORONADAL CITY– Ginapangita na sa karun sang mga otoridad ang isa ka lumad sa banwa sang Tampakan, South Cotabato makaligad luthangon ang isa ka pulis sa nasambit nga banwa.
Sa ekslusibo nga interbyu sang Bombo Radyo Koronadal kay Police Senior Superintendent Nestor Salcedo, Police Provincial Director sang South Cotabato nagluntad ang insidente sang pagpangluthang makaligad ginreport sa Tampakan Police Station ang isa ka Ricardo Tata nga myembro sang B’laan Tribe sa Sitio Bampoy, Brgy. Lampitak Tampakan South Cotabato nga hubog kag nagama-oy kun sa diin may bitbit ini nga armas luthang.
Gilayon nga nagresponder ang tropa sang Tampakan PNP kag naabtan ang suspek nga nagama-oy kag nagapanghangkat sang luthanganay sa nasambit nga lugar.
Samtang nagapalapit ang mga pulis sa puluy-an sini gulpi na lamang nagpalupok ang suspek sang iya homemade shotgun kag naigo si SPO1 Leon Siringan sa iya nga tiyan.
Gilayon naman nga nagpalagyo si Tata sa di mahibaluan nga direksyon kag padayon pa nga ginalagas sang PNP samtang si SPO1 Siringan ang padayon nga gina-obserbaran sa balay bululngan.
Samtang sa ekslusibo nga interbyu sang Bombo Radyo Koronadal kay Daway Mending himata sang suspek dipensa nila nga nasal-an suno pa ni Tata nga armado ang mga pulis rason nga ginluthang niya ini.
