KORONADAL CITY- Yara na sa kustodiya sang mga otoridad ang 3 ka armado nga drug pushers matapos nga maaresto sa ginpatigayon nga anti-illegal drug operation sa Barangay Saravia, Koronadal City.
Ginkilala ni CADAC action officer Dr. Glorio Sandig ang mga nadakpan nga sanday Melvin Delampongan, 35 anyos, residente sang Sitio Angeles, Saravia ; Edres Utto, 31 anyos, residente sang Brgy San Roque kag Lessar Cantoc, 30 anyos nga residente sang Sitio Badak sa nasambit nga barangay.
Suno kay Sandig, madugay na nga ginasurveillance ang mga suspek antes nga nadakpan sa ginpatigayon nga operasyon.
Nakuha sa mga nadakpan ang granada, armas, mga bala, sachet sang ginapatihan nga shabu kag iban pa nga mga drug paraphernalia.
Nahibaluan nga naglagsanay pa ang mga pulis kag suspek sa ginpatigayon nga operasyon apang nadakpan sa gihapon ang mga ini.
Sa subong, ginapreparar na ang kaso nga ipasaka batuk sa ila.
