KORONADAL CITY – Mahipos pa ang mga opisyal sang siyudad sang Koronadal matapos nga ginpasakaan sang kaso nga kriminal kag administratibo sa Ombudsman bangud sa bayulasyon sa environmental laws and policies sa idalom sang RA 9003.
Ang nasambit nga kaso ang ginpasaka mismo sang special panel of investigators sang Environmental Ombudsman program sa Mindanao sa pagpanguna ni Atty. Nelson Edralin batuk kanday Mayor Peter B Miguel, mga konsehal sang siyudad kalakip na ang mga anay opisyal nga subong board members na sang South Cotabato.
Ang nasambit nga kaso ang nag-ugat sa wala pagsunod sang LGU-Koronadal sa pila ka mga probisyon nga nakasaad sa Ecological Solid Waste Management Act of 2006 ukon RA 9003 nga nagsugod nga ipatuman sang Pebrero 2006.
Wala suno pa nasunod sang LGU-Koronadal ang Section 37 kun diin nakasaad ang prohibition sa pag-usar sang Open pit dumps for Solid Waste apisar nga ginhatagan na sila sang tsansa nga masunod ang mga rekomendasyon sang Environmental Ombudsman matapos ang ginpatigayon nga clarificatory hearing sang Oktubre 25, 2016.
Sa subong, nagapreparar na sang ila nga mga counter affidavit ang mga respondents sa kaso nga ginalakipan nadany Mayor Peter B Migiuel, Vice Mayor Eliordo Ogena kag mga anay konsehal nga sanday Rose Dideles, Rebecca Bona, Rene Jumilla, Rogelio Joquino, Oscar Pagunsan, Gregorio Ogoy, Floro Calixton Jr, Ma. Ester Marine Catorce nga subong SoCot 2nd District Board Member, Reynaldo Millan, Sagin Monday, Ellen Grace Subere Albios nga subong SoCot 2nd District Board Member; kasamtangan nga mga konsehal nga sanday Edwin Abris, Erlinda Araquil, Rogelio Cadellino, Marie Antonina Hurtado kag Mark Lapidez.
Kalakip man sa nagapangatubang sang kaso si City ENRO Augustus Bretana.
Nahibaluan nga napulo ka adlaw lamang ang ginhatag sang Ombudsman agud nga makasumiter sang ila nga counter affidavit ang mga ini.
