KORONADAL CITY- Patay ang ginapatihan nga myembro sang local terrorist group nga Ansar ak-Khilafah Philippines makaligad magbato sa mga otoridad samtang pilason naman ang nagresponder nga chief of police sa nagluntad nga engkwentro sa national highway, Brgy. Pagalungan, Polomolok, South Cotabato alas 8:30 kagab-i.
Ginkilala ang napatay nga suspek nga si Benzaid Nilong, residente sang Brgy. Sulit sang nasambit nga banwa kag suno pa katapo sang grupo sang ginapatihan nga local terrorist.
Samtang pilason naman si PCI Alex Joe Orcajada chief of police sang Polomolok PNP makaligad maaksidente ang ginasakyan nga pick-up sang nagresponder nga mga pulis.
Suno kay Police Senior Supt. Nestor Salcedo, acting provincial director sang South Cotabato si Nilong ang isa lamang sa mga estudyante sang leader sang Ansal al-Khilafah Philippines nga si Mohammad Jaafar Maguid alyas Tokboy.
Nahibaluan nga ginsita sang mga nagapatrolya nga pulis ang 2 ka motorsiklo nga wala sang plate number kag headlight nga may bitbit nga M16 armalite rifle apang nagpalagas pa ang mga ini kag didto na nagluntad ang engkwentro nga nagresulta sa kamatayon ni Nilong.
Sa karon nagapadayon pa ang imbestigasyon sa nasambit nga insidente.
