KORONADAL CITY – Dako suno pa ang kumpiyansa ni Pangulong Rodrigo Duterte nga bag-o nga Bangsamoro Basic Law ang ipasar sa kongreso.
Sa eksklusibo nga interbyu sang Bombo Radyo Koronadal kay Presidential Adviser to the peace process Jess Dureza, ginpahayag sini nga ginbag-o sang gindihon nga Bangsamoro Transition Commission (BTC) ang mga ginakuwestiyon anay nga kaundan sang BBL nga wala mapasar sang nagligad nga administrasyon.
Suno kay Dureza, indi dapat matingala ang mga non-muslim, Kristiyano man ukon Lumad bangud kalakip sila sa BBL nga ang tinutuyo amo nga makaangkon sang malinong nga pangabuhi ang tanan.
Rason nga hingyo sini nga hatagan kuntani sang tsansa sang mga pumuluyo sa Mindanao ang komisyon agud nga matuman ang ila gin-istudyuhan sa sulod sang pila ka tuig kag makaangkon ang mga ini sa self-governance.
Ginpasiguro man ni Dureza nga may commitment na ang Moro Islamic Liberation Front (MILF) kag Moro National Liberation Front sa BBL.
Nagalaum man si Dureza nga ini na ang sabat para sa madugay na nga kalinong sa Mindanao.
