KORONADAL CITY – Ginakabig nga dako nga development sang kapulisan ang madinalag-on nga “one time big time operation” nga ginpatigayon sa banwa sang Polomolok, South Cotabato nga nagresulta sa kamatayon sang 2 ka notoryos nga drug pusher kag pagkaarestar sang 21 ka iban pa.
Ini makaligad nga magluwas sa duha nga napatay nga ginkilala kanday Ruben Porsuelo kag Mario Jamela Fuertes sang Barangay Poblacion nga ginapatihan suspek sa pagpatay sa deputy chief of police sang Polomolok Municipal Police Station sang nagligad nnga tuig, kalakip man sa mga naarestar ang katapu sang ISIS inspired group nga Ansar Khilafa Philippines (AKP).
Nahibaluan nga naarestar si Binja Kalab nga residente sang nasambit nga lugar nga ginakabig miyembro sang Ansar Khilafa Philippines (AKP) nga ginapamunuan sadto sang terorista nga si Zulkifli bin Hir alyas Marwan.
Sa interbyu sang Bombo Radyo Koronadal kay South Cotabato Police Director PSSUPT. Nestor Salcedo, ginkumpirmar sini nga lunsay may mga rekord sang pagpatay kag illegal activities ang mga suspek.
Sa subong, napasaka na ang kaso sa mga ini.
Samtang, ginalauman nga masundan pa ang operasyon sang kapulisan sa probinsiya batuk sa illegal nga droga.
