KORONADAL CITY –Nagapanawagan sa subong ang bana sang isa ka Pinay DH nga suno pa mas naglala ang sitwasyon sa pungsod Kuwait matapos nga ginpatuman ang deployment ban.
Personal nga nagbisita sa waragwagan sang Bombo Radyo Koronadal si Noriel Calcena nga residente sang General Santos City agud maghingyo sang bulig nga marescue ang iya asawa nga si Iselle Sweet Calcena sa iya employer.
Suno kay Noriel, nagapakitluoy ini sa iya bana nga marescue kag makapadulong sa Philippine embassy bangud nahadlok ini nga indi na masarangan pa ang pagpanakit sang iya amo nga babaye.
Magluwas diri, wala man sang pahuway, wala ginapakaon sang insakto kag wala sang day off subong man wala naswelduhan sa sulod na sang 2 ka bulan.
Nahibaluan nga mag-isa ka tuig na si Calcena sa Kuwait apang naglala ang pagpanakit sa iya sang employer matapos ang nangin pahayag ni Pangulong Rodrigo Duterte batuk sa gobyerno sang Kuwait.
Sa subong, ginadilian naman nga mag-gamit sang cellphone si Calcena kag ginpaandamn nga sakiton sa tion nga magsugid sa iya nga pamilya.
