KORONADAL CITY – Nakapauli na sa Pilipinas ang isa ka Overseas Filipino Worker (OFW) nga suno pa na-comatose sa isa ka hospital sa Kuwait.
Apang, ginapanginwala ni Overseas Workers Welfare Administration ukon OWWA ARMM Dir. Amy Crisostomo nga na-comatose si Norisa Manambit, 36, nga residente sang Kauran, Ampatuan, Maguindanao kag nagatrabaho nga Domestic helper sa nasambit nga pungsod.
Gin-athag ni Crisostomo nga si Manambit isa ka documented OFW apang napreso kag ginpadeport matapos nga madakpan sang iya nga amo nga nagagamit ini sang cellphone sa oras sang trabaho.
Apang, magapatigayon pa sang imbestigasyon ang OWWA ARMM sa matuod nga natabo kay Manambit kag sa tion nga biktima ini sang pagpang-abuso pagabuligan man ini.
Nahibaluan nga mismo nga ang recruitment agency ni Manambit kag ang mister sini ang nagkumpirmar nga nakapauli na ini sa Pilipinas.
Magluwas sa assistance nga mabaton ni Manambit igapaidalom man ini sa psycho-social debriefing.
Lubos naman ang pagpasalamat sang iya pamilya nga luwas ini nga nakapauli sa pungsod.
