KORONADAL CITY – Nagapadayon sa subong ang ang imbestigasyon sang mga otoridad sa ginhimo nga pagsulod sang yara sa 8 ka mga armado nga kalalakihan sa puluy-an sang isa ka negosyante sa banwa sang Tupi, South Cotabato.
Sa interbyu sang Bombo Radyo Koronadal kay PCI Bernie Faldas, chief of police sang Tupi PNP, pilit nga ginsulod sang mga suspek ang puluy-an sang negosyante nga si Alfonso Hontiveros Suan sa Purok Maunlad, Brgy. Bololmala, Tupi South Cotabato pasado alas-7 kagab-i.
Suno kay Faldas, ginhadlok sang mga suspek nga naka-jacket, mask kag may bitbit nga cal 45 kag M16 armalite rifle ang pamilya Suan kag ginkawat ang kwarata kag mga kagamitan sa sulod sang ila puluy-an.
Paguwa suno pa sang mga suspek sa puluy-an sang pamilya Suan, ginbalabagan nila ang nag-agi nga motorista nga si Art John Dela Cerna nga residente sang siyudad sang Koronadal kag gindala ang motorsiklo sini.
Nagapati naman si Faldas nga isa ka organized armed group ang may kahimuan sang krimen nga nagapatigayon sang operasyon sa South Cotabato kag kaiping nga probinsiya.
Naglab-ot sa masobra P200,000 ang nakuha sang mga armado sa puluy-an sang nasambit nga negosyante.
Sa subong, may ginalantaw na nga mga person of interests ang Tupi PNP sa natabo nga krimen.
