KORONADAL CITY- Nabalabagan sa checkpoint ang 5 ka mga dumuluong nga nagpakilala nga mga katapo sang international media organization sa Brgy. Palian Tupi, South Cotabato.
Nahibaluan nga nabalabagan ang mga ini sang Highway Patrol Group sang South Cotabato kag sang 3rd Provincial Mobile Force Platoon kun sa diin sakay sang truck ang mga dumuluong nga naghalin pa sa Estados Unidos, Europa kag Zimbabwe kun sa diin kaupod suno pa sang mga ini ang pila ka myembro sang Kahugpungan sa mga Lumad sa Halayong Habagatang Mindanao (KALUHAMIN) nga ginasiling nga legal front sang komunista kag rebelde nga New People’s Army.
Suno sa impormasyon halin ang mga ini sa Sitio Datal Bonglangon sa Brgy. Ned Lake Sebu South Cotabato kun sa diin nagluntad ang engkwentro sa tunga sang 33rd IB, 27th IB kag sang tribal militia sang NPA nga padulong sa General Santos City makaligad magpatigayon suno pa sang imbestigasyon angot sa nagluntad nga engkwentro.
Samtang suno kay South Cotabato Gov. Daisy Avance-Fuentes, ginmando sini ang pagmonitor sa mga aktibidad sang mga banyaga nga nakasulod sa probinsya sini nga nakaligad nga adlaw agud hibaluon kun ano ang matuod nga tinutuyo sang mga ini.
Kaangot sini ginpaandaman ni 33rd IB commander ltc. Harold Cabunoc ang mga dumuluong nga indi magpanghilabot sa Domestic Affairs sang Pilipinas kag sa baylo hatagan sang atensyon ang mga problema sa ila mga ginhalinan nga mga pungsod nga nagapangatubang sa gun violence, diskriminasyon kag iban pa.
Nagapati man si Col. Cabunoc nga kabahin sa gihapon sang propaganda sang NPA ang pagpadala sang mga dumuluong sa South Cotabato.
