KORONADAL CITY – Ginkumpirmar ni South Cotabato Provincial Jail Warden Juan Lanzaderas ang pagkapatay sang isa ka inmate kag pagkahospital sang 10 ka iban pa makaligad nga magkaona sang sotanghon sa sulod sang jail.
Sa interbyu sang Bombo Radyo Koronadal kay Lansaderas, ginpahayag sini nga nahilo sang ginkaon nga Sotanghon nga gindala sang misis sang isa ka preso sang Selda 13 sang South Cotabato Provinicial Rehabilitation and Detention Center.
Ginkilala ang napatay nga si Junjun Damukan, 35 anyos sang Banga, South Cotabato nga may kaso nga carnapping kag homicide.
Samtang nakaguwa naman sa South Cotabato Provincial Hospital ang pila ka mga preso.
Suno pa kay Lanzaderas, matapos nga magkaon sang Sotanghon nakabatyag sang sintomas sang pagkahilo ang mga biktima kasubong sang dehydration, pagpalanuka kag pagpalanakit sang tiyan.
Kaangot sini, mas ginpahugtan pa sa subong ang pagsulod sang pagkaon sa sulod sang jail.
Dapat nga ang isulod nga pagkaon sang mga bisita sa mga inmate ang tama lamang kag indi madali nga mapan-os agud nga indi na masulit pa ang hitabo.
Wala naman sang nakita nga foul play si Lansaderas sa natabo.
