KORONADAL CITY- Patay ang isa ka tribal pastor sa nagluntad nga pagpangluthang sang ginaaligar 4 ka mga hubog nga pulis sang Tupi PNP.
Sa eksklusibo nga interbyu sang Bombo Radyo Koronadal kay Herman Dani, 21 anyos, nagpadulong suno pa sila sa Brgy. Poblacion sa nasambit nga banwa agud nga magkaon sang arroz caldo antes nga idul-ong ang ila tiyo nga suldado nga si cpl. Mangilay Dani sa kampo sang 27th IB kun diin kaupod nila si Pastor Lido Dani, 56 anyos, Harinilo Dani 16 anyos kag Marcelino Dawang 34 anyos.
Pag-abot suno pa sa kalan-an, nakadungan nila ang mga pulis nga ginpahayag nakainom kun diin ginsita sila samtang nagaistorya kag ginhangkat sang away si cpl. Dani.
Gilayon naman nga ginbayaan sang maghimata ang lugar apang nakibot sila nga ginsundan sang mga pulis kag nagluntad ang tensyon kun diin nagpatunga si Pastor Dani sang ang isa sa mga ini ang nagpanaya na sang armas luthang.
Ginluthang suno pa ang mga ini sang wala pa makilala nga pulis sa likod kag dughan nga nagresulta sa kamatayon sini.
Lakip suno pa si Brgy. Kapitan Osting Tilo sang Brgy. Kablon ang nagresponder man sa krimen ang ginpahapa, ginbuyayaw kag ginhadlok man sang ginapatihan pulis.
Dugang pa sini nga pamilyar ang mga nawong sang mga suspek kag kumbinsido ini nga mga pulis sang Tupi PNP ang mga ini kun diin isa sa ila ang natumod sa pangalan nga Vargas.
Sa subong nagapadayon pa ang imbestigasyon sa natabo nga krimen.
