KORONADAL CITY- Ginpasakaan na sang kaso may kaangtanan sa iligal nga droga ang ang 5 kaperson sa ginpatigayon nga drug buy-bust operation sang gintingob pwersa nga Philippine Drug Enforcement Agency ARMM, 2ND Platoon Provincial Mobile Force COY, PMPFC, Police Intelligence Branch, CIDG ARMM kag Datu Odin Sinsuat PNP.
Nahibaluan nga target sang operasyon ang drug den nga ginapugaran sang mga notoryus nga nagaduso sang iligal nga droga sa Sitio Siawan, Tamontaka, Datu Odin Sinsuat, Maguindanao.
Ang mga suspek amuh sanday Juhery Sampulna Abdul alyas “Tho” isang drug den maintainer kag Troop Commander sang Muhtalla National Force Command, Moro National Liberation Front (MNLF), 39 years old, samtang ang mga kaupdanan sini amuh sanday Muslimin Banigan Udtong alyas “Toryo”, 27 anyos, Madelo Kasan Abdulkadir alyas “Del”, 25 anyos kag mga residente sang Barangay Tamontaka Mother , Datu Odin Sinsuat, Maguindanao.
Naarestar man ang mga bisita sa drug den nga sanday Datu Solban Makasasa Maulana, alyas “Pamboy” 22 anyos kag Ding Jamad Abdullah alyas “ Abdillah B. Abullah, nga ginapatihan nga myembro sang Moro National Liberation Front (MNLF), 36 anyos.
Nakumpiskar sa posisyon sang mga suspek ang 16 pakete sang shabu nga may kabug-aton nga 20 grams kag may balor nga P100,000, 1 kalibre 45 pistol , mga bala , cellphone nga may kaundan nga illegal drugs transaction kag mga drug paraphernalia.
Sa karun nagapangatubang na ang mga ini sa mga kaso nga paglapas sa RA 9165 o “The Comprehensive Dangerous Drugs Act of 2002” kag Republic Act 10591 ukon Illegal Possessions of Firearms and Ammunitions.
Yara na ang mga ini sa kustodiya sang PDEA ARMM.
