KORONADAL CITY – Ginapreparahan na suno pa ni Board Member Romulo “Mulong” Solivio Sr. sang 2nd District sang South Cotabato ang kaso nga igasang-at batuk kay 33rd Infantry Makabayan Battalion commander Lt Col. Harold Cabunoc.
Ini ang kaangot sa mga akusasyon ni Cabunoc nga suno pa supporter sang rebelde nga New People’s Army kag kabahin mismo sang White Area Operation sang CPP-NPA-NDF nga may tatlo ka tinutuyo nga amuh ang Army Building, Mass Base Building kag Party Building si Solivio.
Sa ekslusibo nga interbyu sang Bombo Radyo Koronadal kay Solivio, hugot sini nga ginpanginwala ang akusasyon ni Cabunoc.
Luwas pa dire, ginpanginwala man sang opisyal nga ginapalapnag sini ang propaganda sang NPA sa mga lumad sa kabukiran ilabi na sa Brgy. Ned Lake Sebu South Cotabato.
Sa pagkamatuod, nagpadala na suno pa ini sang sulat sa National Telecommunications Commission agud mapreserve ang mga interviews kay Cabunoc angot sa pahayag sini nga supporter sya ang NPA.
Luyag suno pa ni BM Solivio nga mahatagan sang hustisya ang tanan nga mga ginahaboy nga akusasyon batuk sa iya.
Samtang nakahanda naman si Cabunoc sa kaso nga igasang-at batuk sa iya ni Solivio.
Suno kay Cabunoc, ang pagsang-at sang kaso batuk sa ila ang kinamatarong ni BM Solivio kag kabahin sang due process of law.
Apang sa pihak sini, magapabilin suno pa ang panindugan sini sa mga ginbuy-an nga mga tinaga angot sa involvement ni BM Solivio sa komunista kag rebelde nga NPA bangud sa mabaskog nga ebidensya suno pa nga uyat sini.
