KORONADAL CITY- Nasunog pasado ala-1 sang hapon ang residential house nga ginapanag-iyahan sang pamilya Palacio sa Purok Paraiso, Barangay Esperanza, siyudad sang Koronadal.
Sa interbyu sang Bombo Radyo Koronadal kay Rey Palacio, tag-iya sang nasunog nga puluy-an, mahimo nga uling ang gintunaan sang bangud bag-o nga kuha lamang ang ginpahimo nga 15 ka sako sang uling sini nga nabutang sa guwa sang ila puluy-an.
Aminado naman si Palacio nga may kapabayaan sa iya nga bahin rason nga nagluntad ang sunog.
Naabo naman ang tanan nga gamit sa sulod sang puluy-an sang pamilya Palacio makaligad nga wala na mahingagaw pa sang nagresponder nga mga bombero.
Ginabulubanta nga naglab-ot sa P1.5-M ang damyos nga ginbilin sang sunog matapos maabo ang duh aka panalgan sang puluy-an apang maswerte naman nga wala malab-ot ang basement sini.
Gindeklarar nga fired out ang sunog alas-4:20 na sang hapon.
