KORONADAL CITY – Balik sa presuhan ang isa ka ex-convict kag ginakabig nga bigtime supplier sang shabu kag 3 pa ka mga kaupod sini makaligad nga maarestar sa ginpatigayon nga drug buy-bust operation sang CADAC kag Koronadal City PNP.
Ginkilala ang mga naarestar nga sanday Jecelyn Palalay, yara sa legal nga edad kag residente sang Fernandez Village Calumpang, General Santos City; Myra Artieda, 39, tag-iya sang puluy-an nga gin-raid sa Purok Malipayon, Barangay Zone 111, Koronadal City; Jimmy Majarocon, 49, residente sang Purok Mabinuligon, Barangay Zone 3, Koronadal City kag Jonathan Salazar, 50 nga residente sang Bacolod City.
Sa interbyu sang Bombo Radyo Koronadal kay CADAC Action Officer Dr. Glorio Sandig, si Palalay ang anay na nga nadakpan bangud sa pagduso man sang droga apang nakapiyansa rason nga nakaguwa sa presuhan.
Samtang, si Artieda ang ginatudlo sang mga asset nga nagaduso sang droga sa siyudad sang Koronadal kag isa sa mga target sang ginpatigayon nga operasyon.
Nakuha sa posisyon sang mga suspek ang 5 ka gramo sang ginapatihan nga shabu nga nagakantidad sang halos P60,000, mga drug paraphernalia kag cash nga nagalab-ot sa P35,000.
Sa subong, yara na sa kustodiya sang Koronadal City PNP ang mga naarestar kag natalana nga pasakaan sang kaso nga paglapas sa Article 2 section 5, 11 kag 12 sang Republic Act 9165.
