KORONADAL CITY – Naglab-ot na sa P 11.3M ang inisyal nga damage assessment sang Bureau of Fire Protection (BFP) Surallah sa natabo nga sunog sa Public market kaina sang kaagahon kun diin 41 ka stalls ang naabo.
Sa interbyu sang Bombo Radyo Koronadal kay Surallah BFP Fire Officer 2 Dennis Corneo, gilayon nga ginapasaka sa Fire Alarm Level 3 ang sunog kag gin-responderan sang mga malapit nga Fire Stations sang Banga BFP, T’Boli BFP, Sto Niño BFP, Koronadal BFP kag ang Volunteer Fire Brigade sang KCC Mall.
Suno kay Corneo, nagsugod ang sunog sa Ukay-ukay section sang nasambit nga Public Market nga gindeklarar nga totaly burned out.
Sa inisyal nga imbestigayon sang BFP-Surallah, faulty electrical wirings ang rason sang sunog.
Gilayon nga ginsapol ni Surallah Municipal Investment Promotion Officer Abelardo Madrona, ang mga stall owners agud nga mahatagan snag gilayon nga bulig ang LGU-Surallah.
Madumduman nga una naman nga nasunog ang kabahin man sang palengke sang tuig 2016.
Samtang, ginapreparar na kuntani sang LGU-Surallah ang demolisyon nga ipatigayon sa mga stalls agud nga masuguran na ang pagatukuron nga edifisyo subong nga tuig.
