KORONADAL CITY – Nahatagan sang paglaum ang mga lumad sa Mindanao sa mga ginpromisa sa ila ni Pangulong Rodrigo Duterte sa ginpatigayon nga Mindanao IP Summit sa lungsod ng Davao.
Ini ang reaksiyon ni Sannguniang Panlalawigan Member kag Indigenous Peoples Mandatory Representative (IPMR) Edgar Sambog sa interbyu sang Bombo Radyo Koronadal.
Suno kay Sambog, una nga tion nga nag-atubang sa mga IP ang pangulo sang pungsod kag ginpamatian ang ila nga mga problema.
Aminado si Sambog nga 80% sang mga IP sa Mindanao ang mga katapu sang rebelde nga NPA bangud ginagamit ang ila nga kakulangan sa edukasyon, kahuyang kag kapigaduhon agud nga makigbato sa gobyerno.
Apang bangud sa ginpromisa nga bulig sang pangulo labi na sa paghata sang pundo para sa pagdevelop sa mga Ancestral land nga nahatag na sa mga tribo, makabulig ini sang dako agud nga mahaw-as sa kapigaduhon ang mga lumad.
Malipayon man sila sa ginpromisa sang pangulo nga personal sini nga pagabisitahon ang banwa sang Lake Sebu, South Cotabato kun diin natabo ang engkwentro sa tunga sang militar kag NPA kun diin may 8 ka mga IP nga napatay nga suno pa biktima lamang sang hitabo.
Kaangot sini, positibo ang mga IP sa Mindanao nga mahatagan na sang 100% solusyon ang ila nga mga problema bangud sa ginapakita nga sensiridad sang pangulo.
