Sa impormasyon nga nakuha sang Bombo Radyo Koronadal, nagluhad ang pagpanglugos sa Prk. Bagacay, Brgy. Caloocan syudad sang Koronadal kun sa diin biktima ang 15 anyos nga dalagita nga ginkilala lang kay alyas Leah nga ginasiling nga bag-o nga recruit suno pa sang grupo sang mga bata nga SUKARAP ukon grupo sang mga kabataan nga may kaangatanan sa sugal, pagpangawat kag rape.
Nahibaluan nga plano lang ni alyas Leah nga magsulod sa grupo kun sa diin gindala ini sa madulom nga kubo sa nasambit nga lugar kag nagpanghagad nga makighilawas ang mga suspek nga yara sa 17 anyos panubo ang mga edad.
Nagpamalibad suno pa si Leah nga makighilawas apang gintayaan ini sang matalom nga ice pick sang isa sa mga suspek rason nga napatigayon sang mga ini ang pagpanglugos.
Makaligad mareport sa Koronadal City PNP ang insidente, ginpahayag ni Koronadal City PNP chief Police Supt. Ronald Allan Peñaverde nga gilayon nila nga nadakpan ang 3 sa mga suspek samtang nakalagyo naman ang isa samtang si alyas Leah ang natrauma sa gihapon sa nasambit nga panghitabo.
Posible naman nga manabat ang mga ginhikanan sang mga nalamita sa gang rape bangud sa pagpabaya sang ila mga kabataan.
Sa subong nagapadayon pa ang imbestigasyon sang Koronadal City PNP sa nasambit nga krimen.
