Koronadal City- Yara na sa kustodiya sang Koronadal City PNP ang 2 ka notoryus nga Motornapper sa Probinsya sang South Cotabato matapos nga maarestar sang gintingub nga pwersa sang Kapulisan kag City Anti Drug Abuse Council sang Koronadal.
Ginkilala ang mga suspek nga sanday Marvin Basilio Ayub kag Omar Alik Abdul nga lunsay mga residente sang Maguindanao.
Sa interbyu sang Bombo Radyo Koronadal kay CADAC Action Officer Glorio Sandig, nakit0an ang mga suspek sang kapulisan sakay sa isa ka motorsiklo nga wala sang plate rason nga ginpapauntat ang mga ini apang nagpalagas pa ini sa kapulisan kag tigayon nga nakorner malapit sa ginapatukod nga terminal sang Koronadal sa Robredo St.
Bangod wala sang napakita nga dokumento ang 2 sa ila mgamotor, gindudahan na sang mga pulis nga ginkawat ini.
Samtang, nakumpiskar kay Abdul ang kalibre .45 nga armas luthang nga may 6 ka bala, isa ka pakete sang shabu nga nakatago sa kaha sang sigarilyo kag mga drug paraphernalia.
Subong man nga nakuha sa posisyon sang driver sang motorsiklo nga si Ayub ang granada, 5 ka bala kag 2 ka improvised master keys nga posible nga gina-usar sa pagpangawat sang motorsiklo.
Nahibaluan nga ginpabakod pa sang kapulisan ang police visibility sa syudad matapos ang yara sa 12 na ka kaso sang motornapping ang napagkit subong nga bulan sang Enero.
Una na nga naaresto sang mga pulis ang isa pa ka carnapper sa Purok Kaugnayan, Barangay GPS nga ginkialala kay Rommel Cahilig samtang ang 2 sini nga kaupdanan ang padayon pa nga ginapangita sang otoridad.
