KORONADAL CITY- Ginakabig nga ikaduha na nga kabuhi sang isa ka Overseas Filipino Worker halin sa Saudi Arabia ang makapauli sa Pilipinas makaligad magpabulig sa Bombo Radyo bangud sa pagpang maltratar nga iya nadangatan sa kamot sang iya mga amo.
Suno kay Evelyn Arat, 31 anyos nga residente sang Brgy. San Jose Koronadal City kag isa ka OFW sa Saudi Arabia, indi sini lubos mahuna-huna nga tuman gali ka budlay nga magtrabaho bilang isa ka Domestic Helper ilabi na sa Middle East kun sa diin dyutay lang nga kinamatarong ang ginahatag sa mga dumuluon nga mga trabahante.
Nahibaluan nga nagpabulig sa Bombo Radyo Koronadal kag kay Bombo Correspondent Boyet Forro si Evelyn bangud wala na sini ginkaya pa ang tuman ka damo nga mga ubra nga baliskad sa nakapagkit sa ila kontrata nga isa ka pamilya lang ang iya pagasirbehan apang 8 ka pamilya ang gina ubrahan sini nga may dyutay lang nga pagpahuway.
Kaangot sini, tuman naman ang pagpasalamat sang OFW sa Bombo Radyo bamgud kun wala suno pa ini nakapauli, posible ginkapatay na sini ang tuman nga trabaho kag kakulangan sang tulog.
Nahibaluan nga si Evelyn ang isa lang sa madamo nga mga OFWs nga biktima sang pagpangmaltratar nga nabuligan sang Bombo Radyo.
